Kryeministri kinez Li Qiang theksoi se Kina dhe ShBA-ja duhet ta zgjidhin problemin e çekuilibrit tregtar duke zgjeruar bashkëpunimin dhe duke krijuar më shumë përfitime të ndërsjella, dhe vuri në dukje rëndësinë e përpjekjeve të përbashkëta për të përballuar sfidat ekonomike.

Gjatë një takimi të dielën me senatorin amerikan Steve Daines dhe udhëheqës të biznesit amerikan që morën pjesë në Forumin e Zhvillimit të Kinës 2025 në Pekin, Li tha se marrëdhëniet kino-amerikane kanë arritur një pikë kyçe.

Ai vuri në dukje se historia ka provuar që të dyja vendet përfitojnë nga bashkëpunimi e humbasin nga kundërvënia dhe u bëri thirrje të dyja palëve që të zgjedhin dialogun në vend të konfliktit dhe bashkëpunimin për përfitime të ndërsjella.

Kreu i qeverisë kineze vuri në dukje gjithashtu që bashkëpunimi ekonomik e tregtar është themel i marrëdhënieve Kina-ShBA dhe se përparimi e ndjeshëm gjatë dekadave të fundit është arritur falë përpjekjeve të përbashkëta.

Përfaqësuesit e biznesit amerikan e vlerësuan transformimin e madh të Kinës gjatë dekadave të fundit. Ata shprehën mbështetjen e tyre të vazhdueshme për zhvillimin e Kinës dhe gatishmërinë për të shtuar investimet, për të forcuar dialogun e bashkëpunimin dhe për të kontribuuar në arritjen e përfitimeve të ndërsjella, për zgjerimin e vazhdueshëm të marrëdhënieve dypalëshe.