Italia me dy fytyra në Dortmund, kundër Gjermanisë. Kombëtarja e Luciano Spallettit e shpëtoi fytyrën gjithsesi, pas një pjese të parë katastrofike. Nga 3-0 në 3-3, dy fytyra krejtësisht të ndryshme brenda kësaj ndeshjeje, që e bëjnë trajnerin italian të reflektojë. Për “Rai Sport”, ai u shpreh qartë:

"Rifillojmë duke analizuar atë që ndodhi. Në pjesën e parë nuk patëm vendosmëri për të bërë lojën tonë dhe për t’i dhënë skuadrës mundësinë të shprehej. Pastaj erdhi ndërgjegjësimi për të bërë më shumë dhe u pa ajo Itali që të gjithë presin".

Për penalltinë e dhënë dhe më pas të anuluar, si dhe për atë të realizuar nga Raspadori: "Nga pankina nuk mund ta shihja mirë, ndaj nuk dua të përfshihem në polemika. Meritonim pak më shumë fat".

Gabimi më i madh ishte të goli i Musiala për 2-0, i pësuar me portën bosh, pas një goditjeje këndi të ekzekutuar shpejt, ndërsa lojtarët italianë protestonin tek arbitri: "Ne e dinim që ata i ekzekutonin shpejt goditjet nga këndi.

Pra, nuk duhet ta kthejmë kurrë shpinën. Por, nëse nuk e zbaton këtë rregull, atëherë duhet të paguash, sikurse na ndodhi neve sonte. Ndoshta është më mirë të pësosh një gol të tillë për të kuptuar se nuk janë vetëm fjalë boshe udhëzimet që japim si staf teknik.

Gabimet ishin të shumta, nuk menaxhuam asnjë top dhe e dinim që do të ishte kështu. Prisja diçka më shumë, por në pjesën e parë ishim në mëshirë të kundërshtarit. Më pas e kuptuam situatën dhe zhvilluam një pjesë të dytë të rëndësishme. Sa i përket Botërorit, ne e dimë si të jemi bashkë dhe si t’i zhvillojmë diskutimet me qetësi".