Igor Tudor është trajneri i ri i Juventusit. Tekniku kroat rikthehet në shtëpi, duke zëvendësuar Thiago Motta dhe marrë përsipër një detyrë aspak të lehtë. "Juventus FC njofton se ka liruar Thiago Motta nga detyra e trajnerit të ekipit të parë.

Klubi e falënderon atë dhe stafin e tij për profesionalizmin dhe punën e bërë me pasion dhe përkushtim gjatë këtyre muajve, duke i uruar më të mirat për të ardhmen. Juventus FC njofton gjithashtu se ia ka besuar drejtimin e ekipit të parë Igor Tudorit, i cili të hënën do të zhvillojë stërvitjen e tij të parë", – thuhet në komunikatën zyrtare të bardhezinjve.

Juventusi ka qenë padyshim aventura më e rëndësishme e Igor Tudor deri më tani si lojtar. Ai u transferua në Itali pikërisht te Juventusi në vitin 1998, pas debutimit në vendlindje me Hajduk Split.

Pa ndërprerje, ai e veshi fanellën bardhezi deri në janar 2005. Gjatë kësaj periudhe regjistroi 174 ndeshje dhe shënoi 21 gola. Nuk ishte mbrojtësi më i mirë i skuadrës bardhezi apo i Serie A, por ishte një alternativë e vlefshme.

Në vitet e tij në Torino, Tudor fitoi dy tituj kampioni në Serie A, dy Superkupa të Italisë dhe Kupën Intertoto në vitin 1999.