Në fakt pritej humbja ndaj Anglisë, në “Wembley”. Diheshin qartë diferencat e mëdha mes dy kombëtareve, edhe historiku i përballjeve të shkuara, para asaj të mbrëmshme për kuqezinjtë tanë: 6 ndeshje, 6 humbje, vetëm një gol i shënuar. Asnjë surprizë, madje duket se jemi disi “të lumtur” që nuk pësuam goleadë, por vetëm 2 gola ndaj “Tre Luanëve”, me një trajner të ri, Thomas Tuchel.

Duke analizuar atë që ndodhi, trajneri ynë kuqezi, Sylvinho, u shpreh pas disfatës 2-0: “Anglia është një nga kombëtaret më të forta, ka dy mbrojtësa qendre shumë të fortë. Kjo ishte vetëm ndeshja e parë. Nuk është shumë e lehtë të vish në ‘Wembley’ dhe të fitosh, unë punoj për këtë gjë.

Këtu luajnë lojtarët më të mirë të botës, është e vështirë. Jam shumë i lumtur dhe krenarë për gjithë lojtarët që luajtën në fushë. Nëse nuk shkon në fushë i organizuar, mund të pësosh edhe 5 gola. Në pjesën e dytë luajtëm më mirë.

Në momentin që u fut Broja bëri një punë të mirë. Aty mund të ishim afruar me barazimin, por shënuan golin e dytë dhe ne humbëm. Nëse nuk i përgatit mirë ndeshjet për 45 minutat e para, përfundon keq.

Kishim vështirësi për t’i bërë presing kundërshtarit. Vetëm Uzuni mund të sulmojë hapësirat. Kemi gabuar në pasimin e parë për të dalë nga zona. Në momentin që del nga ky presing që bëjnë anglezët, mund të rrezikosh.

Nga krahu tjetër ishte një kundërshtar, një skuadër teknikisht fantastike, shumë, shumë e fortë. Ishte e vështirë për mbrojtësit e krahut, Aliji po luan si qendër, jo krah te Dinamo. Në kombëtare e ka bërë shpesh krahun, dua t’i bëj komplimente, sepse ka bërë një ndeshje shumë të mirë. Edhe Balliut, i cili ka ardhur pa luajtur shumë minuta në klub, i duhej të përballonte Rashford”.