TURQI – Opozita turke u bëri thirrje qytetarëve të premten të marrin pjesë në një "natë demokracie", në mitingun e saj të madh ku mijëra njerëz, kryesisht të rinj, po shkonin herët për të denoncuar arrestimin e kryebashkiakut të Stambollit, Ekrem Imamoglu.

Kreu i partisë kryesore opozitare të Turqisë, CHP, siguroi se 300 mijë protestues janë mbledhur sonte në Stamboll, menjëherë pas përfundimit të agjërimit të Ramazanit, për të mbështetur kryebashkiakun.

Ngjarja po zhvillohet pavarësisht paralajmërimeve nga presidenti turk Rexhep Tajip Erdogan, i cili ka thënë se nuk do të tërhiqet përballë "terrorizmit të rrugës".

Për të tretën ditë radhazi të premten, protestuesit u dyndën jashtë bashkisë së Stambollit, duke iu përgjigjur thirrjes së CHP.

“Mos hesht se përndryshe do të vijë shpejt radha jote”, thërrisnin protestuesit. Disa mbanin në duar pankarta me parulla si "Mos kini frikë, populli është këtu" dhe "Drejtë, ligj, drejtësi".

Kryebashkiaku, i cili akuzohet për "korrupsion dhe terrorizëm", do të merrte emërimin e CHP-së të dielën për të qenë kandidati i saj në zgjedhjet e ardhshme presidenciale. “Kudo që jeni, dilni nga shtëpia, bashkohuni me ata që mundeni dhe marshoni së bashku”, u bëri thirrje Ezel mbështetësve të tij.

https://twitter.com/i/status/1903160938234044611