Këlcyrë – Një tjetër operacion i suksesshëm i Policisë ka çuar në zbardhjen e një vjedhjeje me thyerje dhe sekuestrimin e një arme zjarri në zonën e Këlcyrës, raporton noa.al.

Operacioni policor i koduar “Mazhan” ka rezultuar me arrestimin e dy shtetasve, të dyshuar si autorët e një vjedhjeje të ndodhur më 18 mars në një banesë në Këlcyrë.

Sipas kallëzimit të shtetasit B.M., persona të paidentifikuar kishin hyrë me forcë në banesën e tij, duke thyer derën dhe vjedhur pajisje dhe sende të ndryshme. Reagimi i menjëhershëm i specialistëve për Hetimin e Krimeve të Stacionit të Policisë Këlcyrë, në bashkëpunim me Komisariatin e Policisë Ersekë, bëri të mundur kapjen e autorëve të dyshuar:

J.B., 22 vjeç, banues në Ersekë

Një 16-vjeçar, banues në Këlcyrë

Gjatë operacionit, shërbimet e Policisë ushtruan kontroll në një ndërtesë të braktisur në fshatin Mazhan, ku gjetën dhe sekuestruan një armë zjarri gjysmë automatike, e dyshuar se ishte fshehur nga autorët.

Gjithashtu, Policia ka sekuestruar edhe sendet e vjedhura, të cilat ishin shitur nga autorët dhe tashmë do t’i kthehen pronarit.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme ligjore. /noa.al