Flores, Indonezi – Një shpërthim i fuqishëm i vullkanit Levotobi Laki-Laki në ishullin turistik të Flores ka tronditur rajonin mbrëmjen e së enjtes. Autoritetet indoneziane ngritën nivelin e alarmit në maksimum, pas shpërthimit të cilit hiri ka arritur një lartësi prej 8,000 metrash mbi majën e vullkanit.

Shpërthimi ka zgjatur 11 minuta e 9 sekonda dhe ka nisur në orën 22:56 me orën lokale. Sipas agjencisë indoneziane të vullkaneve, goditjet që shoqëruan shpërthimin u dëgjuan edhe në qytetin Maumere, mbi 80 kilometra larg, si dhe në rajonin Larantuka, 50 km nga vullkani.

Në këtë moment, ende nuk raportohet për dëme të mëdha në fshatrat e afërta, por autoritetet paralajmëruan për mundësinë e reshjeve të mëdha dhe formimin e baltës vullkanike, që mund të rrisë rrezikun për banorët.

Për sigurinë e banorëve dhe turistëve, autoritetet kanë vendosur masa të forta, duke ndaluar hyrjen në një zonë prej 7-8 kilometrash rreth vullkanit. Vullkani Levotobi Laki-Laki, me një lartësi prej 1703 metrash, kishte shpërthyer edhe nëntorin e kaluar, duke shkaktuar viktima dhe dëme të konsiderueshme. Atëherë, nëntë persona humbën jetën dhe shumë fluturime ndërkombëtare u anuluan.

Emri "Laki-Laki" në gjuhën indoneziane do të thotë "burrë", dhe ky vullkan ka një "binjak" më të qetë që quhet "grua". Ky shpërthim i ri ka nxjerrë në pah rrezikun e vazhdueshëm të aktivitetit vullkanik në rajon, duke kërkuar mbikëqyrje të vazhdueshme dhe masa të shpejta emergjente për mbrojtjen e jetëve.