Rripin e Gazës e kanë tronditur një seri shpërthimesh, ndërsa ushtria izraelite ka rifilluar bombardimet ndaj objektivave të Hamasit. Këto janë sulmet më të ashpra që nga armëpushimi i 19 janarit.

Sipas raportimeve, të paktën 356 persona kanë humbur jetën.

Forcat izraelite konfirmuan se kanë kryer "sulme të gjera" kundër infrastrukturës së Hamasit, duke theksuar se operacionet u miratuan nga udhëheqja politike e Izraelit.

Qeveria e Benjamin Netanyahut e arsyetoi ofensivën ushtarake me refuzimin e Hamasit për të pranuar një propozim të SHBA-së për zgjatjen e armëpushimit.

Ndërkohë, zëdhënësi i Këshillit të Sigurisë Kombëtare të Shtëpisë së Bardhë, Brian Hughes, deklaroi se Hamasi mund të kishte liruar pengjet për të zgjatur armëpushimin, por zgjodhi refuzimin dhe përshkallëzimin e konfliktit.