Tensionet mes Carlo Ancelottit dhe presidentit të La Liga-s, Javier Tebas, vazhdojnë të rriten. Pas fitores ndaj Villarrealit, trajneri i Real Madridit kërcënoi se nuk do ta lejonte ekipin të luante nëse nuk kishte të paktën 72 orë pushim midis ndeshjeve.

Kjo deklaratë erdhi pasi madrilenët kishin zhvilluar një ndeshje të lodhshme ndaj Atletico Madridit në kthimin e 1/8-ve të Champions League, duke u kualifikuar pas gjuajtjeve të penalltive të mërkurën në mbrëmje.

Tebas iu përgjigj menjëherë në rrjetet sociale, duke shkruar: "Carlo, jam i sigurt që Emilio (Butragueño, nënkryetari i Real Madridit) të ka informuar se La Liga e kishte planifikuar ndeshjen e ardhshme kundër Leganés të shtunën në orën 16:15 për t’ju dhënë më shumë kohë para gjysmëfinales së Kupës së Mbretit ndaj Real Sociedad.

Por Emilio kërkoi nga drejtori i kompeticionit që ndeshja të spostohej në orën 21:00 (besoj me dijeninë dhe aprovimin tënd) për t’i favorizuar lojtarët që vinin nga kombëtaret. Dhe tani, mes ndeshjes së shtunës dhe gjysmëfinales së të martës kanë mbetur më pak se 72 orë! Le të shkojë në finale më i miri! Përshëndetje".

Tebas e mbylli postimin në ‘X’ me një "vazhdon…", duke lënë të kuptohet se përplasja nuk ka përfunduar. Disa javë më parë, Ancelotti e kishte kritikuar Tebas-in gjatë një konference për shtyp para gjysmëfinales së parë të Kupës së Mbretit ndaj Real Sociedad, duke reaguar ndaj deklaratës së presidentit të La Liga-s, i cili e kishte quajtur Real Madridin një klub që "ankohet shumë".

Trajneri italian u përgjigj ashpër: "Tebas flet shumë për Real Madridin dhe i mungon respekti për miliona tifozë madrilenë. Ka probleme më të mëdha në futbollin spanjoll, presidenti i La Liga-s duhet të fokusohet në zgjidhjen e tyre".