Pas humbjes ndaj Fiorentinës dhe konfirmimit të besimit nga Giuntoli, Thiago Motta analizoi ndeshjen e zhvilluar në “Franchi”: "Kundër Fiorentinës ishte vazhdimi i ndeshjes së fundit. Sot, ashtu si ndaj Atalantës, nuk arritëm të reagojmë në momentin e parë të vështirësisë dhe ky është një aspekt ku duhet të përmirësohemi patjetër".

Motta pranoi problemet e ekipit në të dyja fazat e lojës: "Nuk ishim të fortë as në fazën mbrojtëse, as në atë sulmuese. Para këtyre dy ndeshjeve kishim treguar një tjetër fytyrë".

I pyetur nëse do të jepte dorëheqjen pas këtyre rezultateve negative, trajneri bardhezi u shpreh i vendosur: "Të dorëzohesha? Largimi do të ishte shumë i lehtë, por unë nuk i pëlqej gjërat e lehta… Të gjithë kemi përgjegjësi, por unë jam përgjegjësi kryesor që nga dita e parë që kam firmosur kontratën".

Motta theksoi nevojën për të rifituar besimin dhe të gjetur zgjidhje: "Unë duhet të ristartoj gjithçka, të rikthej besimin për të cilin ekipi ka nevojë, që të bëjë më mirë. Është detyra ime të gjej mënyrat dhe motivimin e duhur, që lojtarët të futen në fushë për të bërë punën e tyre".

Lidhur me përjashtimin e Gatti, Cambiaso dhe Yildiz nga formacioni titullar, Motta u përgjigj: "Ndaj Atalantës, të tre e nisën ndeshjen si titullarë. Sot nuk është momenti për të folur për individët, por për të gjetur zgjidhje së bashku. Duhet dhënë diçka më shumë nga secili prej nesh".

Ai e mbylli analizën e tij duke theksuar rëndësinë e stabilitetit në mbrojtje: "Kemi pësuar 7 gola në 2 ndeshje, me shumë gabime nga ana jonë. Sot pësuam një gol nga një goditje standarte dhe dy të tjerë për shkak të mungesës së soliditetit. Duhet të përmirësohemi shumë, si individualisht, ashtu edhe kolektivisht në fazën mbrojtëse".