Një tjetër përmbysje për Milanin e Sergio Conceição, që pas rikuperimit të dy golave disavantazh në Lecce, fitoi 2-1 në “San Siro” kundër Comos, pasi ishte në disavantazh. Një rezultat që e gëzon trajnerin e kuqezinjve, të cilët vazhdojnë të ndjekin zonën europiane: "Nuk ishte një ndeshje e bukur, por në fund fitorja qe e merituar. Ju siguroj se nuk ishte e lehtë pas disavantazhit".

Tri pikë të rëndësishme dhe një përgjigje e fortë nga skuadra për Conceição, i cili pas golit të fitores shpërtheu në festë, duke u kthyer nga tribunat. "Ishte familja ime në stadium, – shpjegoi ai. – Por ishte gjithashtu gëzimi i një trajneri që pa ekipin e tij të humbiste disa raste në fillim dhe më pas të vuante ndaj një kundërshtari që po luante shumë mirë. Pastaj filluam të bënim atë që kishim përgatitur për të shfrytëzuar pikat e tyre të dobëta".

Ai vlerësoi edhe individët, veçanërisht Reijnders, i cili shënoi golin e përmbysjes: "Ai luan mirë kudo dhe gjithmonë e kupton se ku duhet të pozicionohet".

Conceição lavdëroi edhe lojtarët e aktivizuar nga stoli, si Fofana, i cili kishte luajtur më pak kohët e fundit: "Ai kishte luajtur gjithmonë më parë, por gjatë një sezoni ka periudha kur dikush ka nevojë për të marrë frymë. Ajo që më pëlqen është se kushdo që hyn si zëvendësues jep gjithçka për ta ndihmuar ekipin. Edhe Abraham hyri shumë mirë në lojë, ashtu si Joao Felix dhe Loftus-Cheek, i cili është një lojtar i fortë fizikisht dhe teknikisht".

Në fund, ai foli edhe për Santiago Gimenez, sulmuesin e ardhur në janar nga Feyenoordi, i cili ende nuk i ka përmbushur pritshmëritë: "Po punon shumë gjatë javës, por po kalon një periudhë normale të përshtatjes me kampionatin italian. Jam i sigurt që do të bëjë mirë në pjesën e mbetur të sezonit".