Operacioni ‘The Last’ – Arrestohet 37-vjeçari që shfrytëzonte të mitur për vjedhje monopatinash dhe biçikletash në Tiranë

Tiranë – Policia e Komisariatit Nr. 3 ka finalizuar operacionin policor të koduar “The Last”, duke zbardhur dhe dokumentuar 9 raste të vjedhjeve të monopatinave dhe biçikletave.

Në pranga ka rënë shtetasi Y. A., 37 vjeç, i cili rezulton i dënuar më parë për vjedhje. Ky shtetas dyshohet se përdorte dhe nxiste dy të mitur 12-vjeçarë për të kryer vjedhjet, duke i detyruar t’i dorëzonin sendet e vjedhura atij.

Detajet e hetimeve

Sipas policisë, 37-vjeçari ka vjedhur:

🔹 5 monopatina

🔹 3 biçikleta

🔹 1 motomjet

Vjedhjet janë kryer në periudhën shkurt-mars, në zona të ndryshme të Tiranës.

Gjatë arrestimit iu sekuestrua edhe një thikë

Gjatë kontrollit fizik të të arrestuarit, policia i gjeti dhe i sekuestroi një mjet prerës (thikë).

Procedurat ligjore

Materialet e rastit i kaluan Prokurorisë për veprime të mëtejshme procedurale, ndërkohë që hetimet vijojnë për të zbuluar nëse 37-vjeçari ka qenë i përfshirë edhe në vjedhje të tjera.

Policia e Tiranës vazhdon angazhimin e saj për parandalimin dhe goditjen e veprimtarive kriminale. /noa.al