“Duhej të kapërceje trupat për të hyrë në spital” – Dëshmia tronditëse e vëllait të një 16-vjeçareje të plagosur në tragjedinë e Koçanit

Koçan, Maqedonia e Veriut – Një dëshmi rrëqethëse vjen nga vëllai i një 16-vjeçareje të plagosur në zjarrin tragjik të diskotekës "Puls", ku humbën jetën të paktën 51 persona dhe mbi 100 të tjerë u plagosën.

Sipas tij, motra e tij kishte dalë nga diskoteka ndër të parat, por ka pësuar djegie të rënda.

“Isha në vendin e ngjarjes dhe më pas në spital. Ishte diçka e tmerrshme. Në korridoret e spitalit shtriheshin viktima. Duhej të kapërceje trupat për të parë të afërmin tënd.

Vetëm për pak çaste e pashë motrën time, pastaj më thanë se po e transferonin në Shkup për shkak të plagëve të rënda,” – rrëfen ai, me zërin e mbushur me tronditje.

Humbja e jetëve për shkak të një daljeje të vogël

Ai thekson gjithashtu se dalja e diskotekës ishte shumë e vogël, duke e bërë të pamundur evakuimin e shpejtë të personave brenda.

“Ishte një derë e vogël, një kalim i ngushtë. Ishte e pamundur të dilnin të gjithë. Në spital pashë mbi 100 të plagosur. Nuk besoj se ndonjë spital mund të përballojë kaq shumë njerëz njëherësh,” – shpjegon ai.

Një tragjedi e pashembullt në Maqedoninë e Veriut

Sipas informacioneve më të fundit, viktimat janë të moshës 14 deri në 24 vjeç dhe vijnë nga qytete të ndryshme të Maqedonisë së Veriut.

Ndërkohë, hetimet vazhdojnë për të zbuluar shkaqet e sakta të zjarrit, edhe pse dyshimet fillestare tregojnë se shpërthimi i flakëve u shkaktua nga fishekzjarrët e përdorur gjatë koncertit. Vetëm hetimi zyrtar do të përcaktojë përgjegjësit për këtë tragjedi.

Lajmi po përditësohet…