Koçan, Maqedonia e Veriut – Të mbijetuarit e zjarrit tragjik në diskotekën "Puls" po ndajnë momentet e tmerrit që përjetuan natën kur humbën jetën 51 persona dhe u plagosën mbi 118 të tjerë.

Marija Taseva, një 20-vjeçare e plagosur në zjarr, ka treguar për momentin e panikut që shpërtheu brenda diskotekës, ndërsa të pranishmit përpiqeshin me çdo kusht të shpëtonin jetën.

"Të gjithë filluan të vrapojnë jashtë. Secili kërkonte të shpëtonte veten. Sapo dola jashtë, rashë në tokë dhe njerëzit më shkelën. Ishte e pamundur të ngrihesha, fytyra më mbeti ngjeshur në dysheme.", – dëshmon ajo me lot në sy, duke folur me MIA.

Por për Marijan, dhimbja nuk ndalet këtu. Motra e saj 25-vjeçare është ende e zhdukur.

“Nuk mund ta gjejmë askund. E kemi kërkuar në çdo spital. Tani po presim rezultatet këtu, nëse nuk është këtu, atëherë ndoshta në Shkup,” – thotë ajo, me shpresën se do të marrë një lajm për të motrën.

Familjet në ankth për të afërmit e zhdukur

Babai i Marijas, si shumë familjarë të tjerë, po përjeton momente të rënda pasigurie, pasi ende nuk ka asnjë informacion për vajzën tjetër.

Në spitalet e Shkupit, Shtipit dhe Koçanit, ende vazhdon identifikimi i viktimave, pasi disa prej tyre nuk kishin dokumente me vete në momentin e tragjedisë.

Situata e të mbijetuarve dhe hetimet

Ndërkohë, të plagosurit po trajtohen në spitale, me disa prej tyre që ndodhen ende në gjendje të rëndë. Hetimet po vazhdojnë për të zbuluar çfarë ndodhi saktësisht atë natë dhe kush do të mbajë përgjegjësi për këtë tragjedi.