Korçë – Një rrjet i trafikimit të emigrantëve është goditur në Korçë, ku një 41-vjeçar është arrestuar për ndihmën e dhënë ndaj shtetasve që tentonin të kalonin kufirin ilegalisht.

Operacioni i koduar "Green Border", i zhvilluar nga Drejtoria Vendore për Kufirin dhe Migracionin Korçë, në bashkëpunim me Policinë Kufitare të Kapshticës, çoi në ndalimin e shtetasit B. M., 41 vjeç, banues në Devoll.

Si funksiononte skema kriminale?

Sipas hetimeve, ky shtetas, në bashkëpunim me K. I., i cili është arrestuar në Greqi, organizonte kalimin e paligjshëm të emigrantëve drejt shtetit grek, duke përfituar nga 600 deri në 800 euro për person.

Në mesin e personave që ai ndihmonte ishte edhe një foshnjë 9-muajshe me mamanë e saj, të cilët tentonin të kalonin kufirin në mënyrë të paligjshme përmes kufirit të gjelbër të Kapshticës, raporton noa.al.

Hetimet zbulojnë një rrjet të organizuar Policia kufitare shqiptare dhe ajo greke shkëmbyen informacione, duke konfirmuar se ky aktivitet kriminal ishte përsëritur disa herë më parë.

Pas hetimeve të thelluara, rezultoi se B. M. dhe K. I. kishin organizuar më herët disa kalime ilegale, duke e kthyer këtë në një biznes të rrezikshëm që vinte në rrezik jetën e emigrantëve të dëshpëruar.

Materialet i kaluan Prokurorisë së Korçës për veprime të mëtejshme, ndërkohë që hetimet vazhdojnë për të identifikuar persona të tjerë të përfshirë në këtë rrjet të trafikimit të emigrantëve. /noa.al