Carlo Ancelotti doli sërish para mediave në qytetin sportiv të Real Madridit për të analizuar ndeshjen kundër Villarrealit dhe komentuar, me kërkesën e gazetarëve, polemikën e 11-metërshit të anuluar të Julián Álvarez në euro-derbin madrilen të Champions League.

Trajneri italian iu përgjigj si gjithmonë në çdo pyetjeje dhe u shfaq i kënaqur pas kualifikimit në çerekfinale, por shprehu shqetësimin e tij për ndeshjen ndaj Villarrealit, e cila është vendimtare për të shkuar në pushimin e kombëtareve me një ndjenjë të mirë. “Carletto” e bëri të qartë se gjendja fizike e lojtarëve të tij nuk është ideale.

Penalltia e Julián Álvarez dhe rregulli: "Nuk e kam ndjekur shumë zhurmën që është bërë, sepse për ne ndeshja ka përfunduar. A do ta ndryshoja rregullin? Nuk e di. Rregulli është ai që është".

Gjendja fizike dhe fakti që luajnë të shtunën: "Jemi ende në fazë rikuperimi, ky është një aspekt që duhet ta kemi parasysh përballë një kundërshtari të vështirë. Duhet të luajmë një ndeshje inteligjente. Nuk e kuptoj pse duhet të luajmë të shtunën dhe shpresoj që një ditë të mund ta ndryshojmë këtë kalendar. Prioritet kanë të drejtat televizive, paratë…, gjëja e fundit që mendohet është rikuperimi i lojtarëve".

Vinicius do të luajë kundër Villarrealit: "I dhamë një ditë pushim më tepër, sepse ishte shumë i lodhur, por ai do të jetë gati për Villarrealin. Për mua është i padiskutueshëm. Mund të ketë momente më të mira ose më të këqija, por nuk vihet në dyshim. Ka qenë kaq i rëndësishëm për këtë klub, sa nuk mund të diskutohet".

Drejt 72 ndeshjeve dhe një sezoni historik: "Pavarësisht të gjitha vështirësive, jemi ende në garë për tri kompeticionet më të rëndësishme, diçka që nuk ka ndodhur në tri vitet e fundit. Në vitin tim të parë u eliminuam nga Kupa e Mbretit në janar, në të dytin dolëm nga gara për La Liga-n dhe sezonin e kaluar u eliminuam nga Kupa po në janar. Këtë vit jemi ende në të gjitha garat".

Një sezon stresues për shkak të kalendarit: "Është një sezon stresues, por vetëm për shkak të kalendarit. Që nga janari kemi luajtur dy ndeshje çdo javë, të shtunën kemi ndeshjen e 21-të ose të 22-të. Nuk ka kohë për t’u rikuperuar nga presioni, por ky është realiteti. E vetmja gjë që mund të bëja është të ndaloja, por nuk dua të ndaloj, sepse më pëlqen ajo që po bëjmë".

Thirrja e Asensios në kombëtare: "E kemi festuar, është një lajm i shkëlqyer. E ka merituar për punën dhe seriozitetin e tij. E meriton gjithçka. Shpresoj që të jetë thirrja e parë nga shumë të tjera".

Strategjia ndaj Villarrealit: "Do të na duhet një përpjekje shtesë. Nuk mund të kemi freski fizike, sepse nuk kemi kohë. Sidoqoftë mund të ofrojmë cilësi, qëndrim të mirë, të luajmë një ndeshje inteligjente… Nuk ka vetëm një mënyrë për të fituar, mund të mbrohemi mirë".