Një 46-vjeçar ka rënë në prangat e policisë në Tiranë, pasi ishte dënuar për prodhim dhe shitje droge.

Shtetasi Florian Buçka, banues në Tiranë, ishte shpallur në kërkim pas një vendimi të Gjykatës së Tiranës, e cila e ka dënuar me 7 vjet e 3 muaj burgim për veprat penale “Prodhim dhe shitje narkotikësh” dhe “Futja dhe mbajtja e sendeve të ndaluara në institucionin e ekzekutimit të vendimeve në burg”.

Operacioni policor i koduar “Ndalesa” u organizua nga shërbimet e Komisariatit të Policisë Nr. 1, në bashkëpunim me Seksionin e Narkotikëve, pas marrjes së informacionit në rrugë operative për vendndodhjen e tij.

Pas një operacioni të mirëorganizuar, Florian Buçka u kap në rrugën “Ali Demi” dhe u arrestua për t’u vënë para përgjegjësisë ligjore për veprat e kryera.