Joshua Kimmich më në fund ka shuar çdo dyshim mbi të ardhmen e tij. Pas një pritjeje të gjatë dhe tërheqjes fillestare të ofertës nga Bayern Munich, kapiteni i kombëtares gjermane ka rinovuar zyrtarisht kontratën me klubin bavarez deri në vitin 2029.

Kjo zgjatje e kontratës vjen pas rinovimeve të fundit të lojtarëve kyç si Manuel Neuer, Alphonso Davies dhe Jamal Musiala, duke konfirmuar strategjinë e Bayernit për të blinduar yjet e tij për të ardhmen.

"Te Bayerni kam ambientin ideal për të arritur objektivat e mi sportivë. Prandaj e kam marrë këtë vendim, – deklaroi Kimmich për kanalet zyrtare të klubit bavarez. – Për mua, aktualisht nuk ka një kombinim më të mirë se shokët e skuadrës, stafi teknik dhe struktura e klubit për të siguruar suksesin maksimal. Ndihem shumë mirë këtu, ende nuk e kam përfunduar rrugëtimin tim".

Drejtori sportiv, Christoph Freund, e vlerësoi Kimmichin duke thënë: "Të gjithë mund të shohin sa pasion ka ai për lojën dhe Bayernin, minutë pas minute. Si lider, ai udhëheq dhe motivon ekipin, duke qenë një forcë shtytëse për të ardhmen e klubit".

Gjithashtu, CEO i Bayernit, Jan-Christian Dreesen, e cilësoi urinë e Kimmich për sukses si të pashtershme, veçanërisht e dukshme në fazën e Champions League: "Përkushtimi dhe vendosmëria e tij mishërojnë vlerat e Bayern Munich. Kimmich është figurë kyçe për të ndërtuar një urë mes brezit aktual të lojtarëve dhe epokës së re që po vjen".