Lamine Yamal, në dokumentarin “Decoded” të DAZN, ndau detaje mbi karrierën e tij te Barcelona, qasjen ndaj futbollit dhe pritshmëritë për të ardhmen. Ai theksoi mentalitetin e tij: "Presioni nuk ekziston, është diçka mendore. Duhet thjesht të mendosh për ta shijuar lojën e futbollit". Pra, për të presioni është një justifikim, sepse e vetmja gjë që ka rëndësi është kënaqësia nga loja.

Ai foli për ndihmën psikologjike që ka marrë nga Barcelona, duke kujtuar sfidat e të luajturit me futbollistë më të mëdhenj në moshë: "Në atë moshë bën budallallëqe, ndërsa ata janë duke paguar qiranë ose duke ngarë makinën e nënës".

Yamal tregoi se ka hequr dorë nga rrjetet sociale për të shmangur komentet negative dhe theksoi se për të ka rëndësi mendimi i trajnerit, kapitenëve dhe familjes, më shumë sesa ai i mediave.

Për objektivat e tij, 17-vjeçari shtoi: "Shpresoj të fitoj Champions League dhe të përjetoj Kupën e Botës me emocion". Talenti i ri katalanas shprehet i motivuar për të arritur nivelin maksimal.

Si figurë frymëzimi për fëmijët me origjinë marokene dhe spanjolle, ai u shpreh krenar për këtë rol. Duke kujtuar sharjet raciste në një ndeshje ndaj Real Madridit, ai rrëfeu një moment me nënën e tij: "Ajo u shqetësua shumë, por unë isha i lumtur, sepse kishim fituar 4-0. Pra, më pëlqen të fokusohem tek aspektet pozitive të jetës”.

Si lojtar, Yamal e përshkruan veten si kreativ dhe argëtues: "Mund të rri një minutë pa prekur topin, por pastaj mund të bëj diçka interesante".

Ai pranoi se nuk e kishte menduar një ngritje kaq të shpejtë te Barcelona dhe kujtoi një detaj nga fëmijëria, që ndikoi në stilin e tij: "Shkathtësinë në driblim e kam mësuar edhe falë qenve të mi".