Dy turistë gjermanë, të cilët kishin humbur orientimin gjatë eksplorimit në mal në fshatin Labovë e Madhe, Odrie, janë shpëtuar nga Policia e Gjirokastrës në një operacion të suksesshëm të zhvilluar mbrëmjen e djeshme.

Rreth orës 21:00, shërbimet e Seksionit të Forcës së Posaçme “Shqiponja” morën një telefonatë urgjente nga dy turistët, të cilët kërkonin ndihmë pasi kishin mbetur të izoluar në terrenin e vështirë të malit, për shkak të errësirës dhe mungesës së orientimit.

Ekipet e policisë u nisën menjëherë drejt zonës për të lokalizuar dhe ndihmuar turistët e huaj.

Pas koordinimit të shpejtë dhe angazhimit maksimal, ata u gjetën dhe u transportuan të sigurt në automjetin e tyre në fshatin Labovë e Madhe.

Fatmirësisht, të dy turistët ishin në gjendje të mirë shëndetësore, raporton noa.al.

Turistët kanë shprehur mirënjohje ndaj shërbimeve të Policisë për ndihmën e dhënë në kohë rekord.

View this post on Instagram

A post shared by Agjencia Kombëtare e Lajmeve NOA (@noanews)

Policia e Gjirokastrës thotë se vijon të jetë e angazhuar maksimalisht në shërbim të qytetarëve dhe vizitorëve dhe i fton të gjithë ata që kanë nevojë për ndihmë, të kontaktojnë menjëherë në numrin pa pagesë 112. /noa.al