Arrestohet një grua për vrasje pasi jetoi me trupin e nënës së vdekur dhe dhjetëra mace. Trupi ishte në dekompozim të avancuar. Gruaja u dërgua në një spital psikiatrik

Athinë- Një 66-vjeçare është arrestuar në Athinë pasi policia zbuloi trupin e nënës së saj në një gjendje të rëndë dekompozimi brenda apartamentit të saj në lagjen Eksarhia.

Gruaja K.M., akuzohet për vrasje dhe për fshehjen e trupit për një kohë të gjatë, duke e mbajtur atë në qese plehrash për të mos humbur të drejtën e banimit në apartamentin që i ishte dhënë nga miq të familjes, raporton noa.al.

Përveç kësaj, autoritetet kanë ngritur akuza ndaj saj për keqtrajtimin e mbi 40 maceve që mbante në apartament.

Zbulimi i ngjarjes makabre erdhi pas një denoncimi për abuzim të kafshëve nga pronari i një banese në Kineta, ku gruaja kishte jetuar më parë. Ai raportoi jo vetëm për qiranë e papaguar, por edhe për kushtet e mjerueshme në të cilat mbaheshin macet.

Hetimet zbuluan se gruaja kishte edhe dy apartamente të tjera në Athinë, ku gjithashtu mbante më shumë mace në kushte të rënda. Fillimisht, ajo u tha fqinjëve se nëna e saj ishte ende gjallë, por me kalimin e kohës, banorët e pallatit nisën të dyshonin dhe njoftuan autoritetet.

Kur policia dhe administratori i ndërtesës hynë në apartamentin e saj, gruaja u detyrua të tregonte trupin e pajetë të nënës së saj, i cili ndodhej në një fazë të avancuar dekompozimi. Trupi gjendej nën krevatin ku 66 vjeçarja flinte.

Hetimet nxorën se e ndjera kishte ndërruar jetë që më 30 korrik 2017 dhe që atëherë dergjej nën shtratin e së bijës.

Gjithashtu, policia gjeti mace të mbyllura në kafaze, të uritura dhe pa ujë për ditë të tëra.

Trupi u zbulua më 8 mars në rrugën Tzavella në Eksarhia, ndërsa gruaja u arrestua menjëherë dhe sot u publikuan të dhënat në media. Pas ndalimit, ajo u dërgua në spitalin "Evangelismos" në klinikën psikiatrike për shtrimin e detyruar dhe pritet t’i nënshtrohet një vlerësimi të shëndetit mendor. /noa.al