Policia e Shtetit ka finalizuar me sukses operacionin policor të koduar “Tentakulat”, i cili kishte në shënjestër një grup kriminal të përfshirë në shitjen dhe trafikimin e lëndëve narkotike që nga viti 2019.

10 anëtarë të grupit të identifikuar, 5 të arrestuar dhe 5 në kërkim

Gjatë operacionit, Drejtoria për Hetimin e Krimit të Organizuar në bashkëpunim me DVP Tiranë dhe DVP Dibër, dhe nën drejtimin e Prokurorisë së Tiranës, ka ekzekutuar masën e sigurisë “Arrest në burg” për:

🔹 Dritan Uka, 45 vjeç 🔹 Alban Grori alias Alban Gruri, 47 vjeç 🔹 Mehdi Gjoka, 56 vjeç 🔹 Ylber Tahiri alias Ylli Hida, 51 vjeç 🔹 Ramazan Doçi, 30 vjeç

Ndërkohë, janë shpallur në kërkim dhe vijon puna për arrestimin e:

🔹 A. D. alias A. D., 51 vjeç 🔹 A. D., 48 vjeç 🔹 N. G., 35 vjeç 🔹 E. T., 24 vjeç 🔹 I. P., 34 vjeç

Si funksiononte grupi kriminal?

Sipas hetimeve të Policisë, ky grup siguronte lëndë narkotike të llojit Cannabis Sativa nga zona të ndryshme në Krujë dhe Dibër dhe më pas e shpërndante në lokale në Tiranë ose e trafikonte në Kosovë.

Operacioni “Tentakulat” ka lidhje me operacionin “Crossborder Line”, i zhvilluar në nëntor 2024 nga Policia e Gjirokastrës, ku u identifikuan 11 bashkëpunëtorë të tjerë të këtij rrjeti.

Hetimet vazhdojnë për të nxjerrë përpara përgjegjësisë ligjore të gjithë anëtarët e grupit. Materialet procedurale i janë referuar Prokurorisë së Tiranës për veprime të mëtejshme.