Asfiksimi në magazinën e ‘Rossman & Lala’, 6 punonjëse përfundojnë në spital! Hetimet për shkaqet

Tiranë – Gjashtë punonjëse të një magazine në superstradën “Tiranë-Durrës” janë dërguar për kujdes mjekësor në spital, pasi kanë shfaqur probleme respiratore gjatë punës.

Ngjarja ka ndodhur të martën më 11 mars 2025, në ambientet e kompanisë "Rossman & Lala", ku punonjëset dyshohet se janë asfiksuar nga një faktor ende i panjohur.

Pas marrjes së ndihmës mjekësore, ato janë larguar në banesat e tyre.

Hetimet në vijim

Policia ka referuar materialet në Prokurori, e cila po heton për shkaqet e incidentit dhe përgjegjësi të mundshme të kompanisë.

Autoritetet po verifikojnë nëse magazina përmbushte standardet e sigurisë në punë dhe nëse punonjëset kanë qenë të ekspozuara ndaj gazrave apo kimikateve të rrezikshme.

Noa.al u përpoq të komunikonte me zyrtarët e kompanisë, por nuk mori përgjigje për pyetjet e shtruara, deri në publikimin e këtij lajmi.

Report tv raportoi më herët sot, se nga marrja në pyetje që grupi hetimor ka bërë, është mësuar që aroma e rëndë është ripërsëritur edhe një herë tjetër para disa muajsh, por pa probleme dhe shtoi se i vetmi objekt që ndodhet i ri në magazinë është ashensori, tek i cili janë dyshimet paraprake, megjithatë pritet ta përcaktojnë hetimet në vijim.

Foto arkiv