Policia franceze ka çmontuar një bandë kriminale shqiptare, që kishte kryer rreth 50 grabitje në vilat dhe rezidencat e personazheve publikë, si futbollistë, pilotë të Formula Uno apo këngëtarë të famshëm në Francë e Belgjikë.

Në total, banda e shqiptarëve rezulton të ketë vjedhur mbi 1 milion euro, përfshi bizhuteri dhe artikuj luksozë, që i kanë shitur më pas në Shqipëri. Bëhet fjalë për anëtarët e grupit të Edison Pulës, shqiptari i njohur si mjeshtër i arratisjeve dhe anëtar i bandës së Niklës, i cili u arrestua në janar të 2025-ës në Luksemburg.

Arrestimet e bandës së grabitjeve janë kryer në dy faza: dy prej anëtarëve të dyshuar të rrjetit, të njohur me emrin “Nikla”, u arrestuan më 20 janar në Luksemburg, në kuadër të urdhër-arresteve evropiane të lëshuara nga Gjykata e Reims-it, sipas njoftimit zyrtar. Pesë persona të tjerë u ndaluan të martën e kaluar në zonën e Reims-it.

Drejtuesi i bandës, Edison Pula, u identifikua falë gjurmëve të ADN-së, të gjetura në më shumë se 30 grabitje, kryer mes qershorit 2022 dhe shtatorit 2024, ndërsa është i dyshuar gjithashtu edhe për një tentativë vrasjeje në Shqipëri.

Hetimet janë zhvilluar nga Zyra Qendrore për Luftën kundër Kriminalitetit, në bashkëpunim me  Seksionin e Kërkimeve dhe Brigadën e Kërkimeve të Reims-it, si dhe Brigadën për Luftën kundër Banditizmit të Policisë Kriminale të Parisit.