Nëna e 34-vjeçarit ka njoftuar Policinë e cila organizoi një operacion policor, duke arrestuar dy persona

Policia është thirrur për të hetuar një rast të pazakontë. Gjithçka nisi kur familja e një 34-vjeçari nga Athina në Greqi, denoncoi rrëmbimin e tij nga një emigrant 37-vjeçar në rajonin e Artës, raporton noa.al.

Emigranti kishte kontaktuar me ta duke kërkuar një shpërblim prej 3200 eurosh, para të cilat i ishin paguar në llogarinë e tij bankare.

Por, më pas u zbulua se djali i familjes dhe emigranti kishin inskenuar bashkërisht rrëmbimin për të marrë paratë nga familja e grekut.

Konkretisht, sa i përket kronologjisë së rastit, të afërmit e të riut grek kanë denoncuar në policinë e Athinës se ai ishte rrëmbyer nga një i huaj, i cili kërkonte pagesën e një shpërblimi prej 3200 eurosh, shumë e cila i ishte transferuar në llogarinë e tij bankare.

Pas hetimeve me metoda speciale, efektivët e Policisë së Hetimit të Krimeve kanë lokalizuar shtëpinë e emigrantit në një fshat të Artës, ku dyshohej se mbante shtetasin vendas.

Pas një operacioni të organizuar policor me pjesëmarrjen e një ekipi të Njësisë Speciale Represive Antiterroriste të Selanikut dhe negociatorëve specialë të Drejtorisë së Policisë së Artës dhe Prevezës, dy personat që gjendeshin aty u prangosën.

Nga ecuria e hetimeve paraprake, rezultoi se të pandehurit kishin hartuar bashkërisht një plan për të nxjerrë nga familja e shtetasit grek shumën e kërkuar të parave me pretekstin e rrëmbimit të tij.

Në kuadër të hetimeve janë sekuestruar 3 aparate celularë dhe 420 euro.

Vihet re se të dy të pandehurit kanë qenë të dënuar në të kaluarën për vepra të rënda penale. /noa.al