Trupi i pajetë i 49-vjeçarit Naim Likometi gjendet në plazhin e Gjirit të Hartës

SARANDË – Pas dy ditësh kërkimesh intensive, policia ka gjetur trupin e pajetë të 49-vjeçarit Naim Likometi në plazhin e Gjirit të Hartës, duke i dhënë fund misterit të zhdukjes së tij.

Sipas burimeve policore, trupi u zbulua në orët e pasdites dhe u transportua menjëherë drejt morgut për autopsi, me qëllim përcaktimin e shkakut të saktë të vdekjes. Paraprakisht, dyshohet se 49-vjeçari është mbytur në det, por autoritetet nuk përjashtojnë asnjë pistë hetimi.

Likometi, banor i Tiranës, ishte shpallur i zhdukur që nga mëngjesi i 8 marsit. Misteri rreth fatit të tij u thellua më tej kur rrobat dhe telefoni i tij u gjetën në breg të detit. Sipas familjarëve, celulari i tij ka qenë aktiv deri në orën 16:00 të së njëjtës ditë, përpara se të fiket, duke e bërë edhe më të vështirë lokalizimin e tij.

Policia jep detaje mbi ngjarjen

Në një deklaratë zyrtare, Policia e Sarandës konfirmoi gjetjen e trupit të pajetë rreth orës 14:00 në Gjirin e Hartës dhe bëri të ditur se viktima ishte shpallur i zhdukur pas kallëzimit të bërë nga bashkëshortja e tij.

"Trupi i këtij shtetasi u gjet si rezultat i kërkimeve të pandërprera të kryera nga shërbimet e Komisariatit të Policisë Sarandë, në bashkëpunim me shërbimet e Policisë Kufitare Sarandë, pas kallëzimit të bërë dje nga bashkëshortja e tij për humbjen e kontakteve me të," thuhet në njoftimin e Policisë.

Ndërkohë, grupi hetimor po punon për sqarimin e rrethanave të ngjarjes dhe nuk përjashton asnjë pistë hetimi. Autoritetet vijojnë punën për të zbardhur plotësisht këtë ngjarje tragjike.