Mision i përfunduar për Real Madridin, i cili mundi 2-1 Rayo Vallecanon dhe e arriti Barcelonën në krye të klasifikimit të La Liga-s. Ndeshja e djeshme ishte speciale për Federico Valverde, i cili arriti 200 ndeshje në kampionat me ekipin e kryeqytetit madrilen (“Los Blancos”).

Mesfushori uruguajan komentoi në RMTV: "Është nder të vazhdoj të luaj për ekipin më të mirë të botës. Falënderoj familjen time, shokët e skuadrës dhe tifozët. E rëndësishme ishte të fitonim. Ishte një ndeshje paksa e mërzitshme, por duhej të merrnim tri pikët, duke u përgatitur për atë që do të vijë në Ligën e Kampionëve.

Ende jemi në krye të klasifikimit, personalisht jam i lumtur dhe mendërisht i qetë. Me ndihmën e mjekëve dhe fizioterapistëve mund të rikuperohemi, duhet të punojmë dhe të rritemi. Do të jap gjithmonë 100% për këtë fanellë”.