Tiranë, 6 mars 2025– Kryetari i Partisë Demokratike, Sali Berisha, ka reaguar ashpër ndaj deklaratave të Kryeministrit Edi Rama mbi ndërtimin e një "shteti islamik bektashi". Ai ka theksuar se Rama ka ndryshuar fenë disa herë gjatë jetës së tij, duke e quajtur atë politeist dhe duke pyetur se si mund të besojnë njerëzit te ai.

Në një intervistë për mediat, Berisha tha: "Një njeri që ka ndërruar fetë sa herë është martuar, ai është politeist, ai nuk është monoteist. Si mund t’i besojmë ne atij?" Ai e konsideron si fyese për Kuranin deklaratën e Ramës për ndërtimin e një shteti islamik bektashi, duke shtuar: "Si mund të citosh Kuranin dhe nga ana tjetër të thush që do krijosh shtetin islamik bektashi? Ta gjejë në Kuran ku ekziston kjo."

Berisha e ka cilësuar këtë si një fyerje të rëndë ndaj Kur’anit, i cili për të është fjala e Zotit. Sipas tij, Rama përdor elementë të fesë dhe të Kur’anit për propagandë dhe qëllime elektorale, dhe kjo e bën të dyshimtë autoritetin e tij në fushat që lidhen me besimin dhe moralin. Ai ka theksuar se ky veprim është një tjetër shembull i përdorimit të fesë për interesat personale të Kryeministrit.