Lautaro Martinez vazhdon të shkruajë historinë e Interit. Me golin e tij për avantazhin 2-0 kundër Feyenoordit, në ndeshjen e parë 1/8 finale të Champions League, kapiteni zikaltër është bërë golashënuesi më i mirë në historinë e klubit zikaltër në këtë kompeticion (Champions League/Kupën e Kampionëve), duke arritur 18 gola, një më shumë se Sandro Mazzola.

Përveç kësaj, Lautaro ka vendosur edhe rekordin e tij personal për numrin më të madh të golave në një edicion të vetëm të kompeticionit, duke shënuar 6 herë deri tani.

"Krenaria është fjala e parë që më vjen në mendje, – tha Lautaro për “Prime Video”, pas ndeshjes. – Jam mirënjohës ndaj Interit, tifozëve, shokëve të skuadrës. Pa ta, nuk do t’i arrija këto suksese. Falënderoj familjen time në Argjentinë dhe atë në Itali, gruan dhe fëmijët e mi.

Flitet shumë për Interin, por ne luajmë çdo dy ditë prej 8 muajsh. Kemi një kalendar të ngjeshur, por zbresim gjithmonë në fushë për të dhënë maksimumin për këtë fanellë. Sonte kishim disa vështirësi në një repart, Bastoni e meritonte këtë vlerësim për sakrificën e bërë. Duhet ta përgëzojmë atë dhe gjithë ekipin.

Blasfemia? Unë jam një person që i respekton të gjithë. Këtë çështje e kam lënë pas. Kam sqaruar gjithçka, më akuzuan për diçka që nuk ishte e vërtetë. Unë e tregoj veten në fushë, ashtu siç më kanë mësuar që fëmijë.

E ardhmja? Do të më pëlqente të qëndroja tek Interi gjatë gjithë karrierës sime, jam shumë i lumtur këtu. E rinovova kontratën pas ‘Copa America’, megjithëse kisha shumë oferta në tavolinë. Vendosa të qëndroj, sepse këtu jam gjithmonë i lumtur. Çdo mëngjes zgjohem me gëzim për të shkuar në stërvitje. Edhe familja ime është e lumtur".