Lezhë, 6 mars 2025 – Një person i pajetë, ende i paidentifikuar, është gjetur mëngjesin e sotëm nga punonjësit e mirëmbajtjes së rrugëve në kryqëzimin e Rrugës së Kombit, ku ndahen aksi i Rrugës së Kombit dhe segmenti drejt Lezhës. Punonjësit e mirëmbajtjes konstatuan viktimën dhe menjëherë lajmëruan policinë.

Trupi i pajetë është gjetur pranë trafikndarësve, dhe dyshimet e para janë se viktima mund të ketë humbur jetën si pasojë e përplasjes nga automjetet. Megjithatë, hetimet janë ende në vazhdim dhe pritet kryerja e autopsisë për të përcaktuar me saktësi shkaqet e vdekjes.

Policia ka nisur hetimet për të zbardhur rrethanat e ngjarjes dhe për të identifikuar viktimën. Ajo ka apeluar për çdo informacion që mund të ndihmojë në zbardhjen e kësaj tragjedie.

Kurbin/Informacion paraprak

Rreth orës 08:50, është gjetur në trafikndarësen e autostradës “Milot-Thumanë”, në fshatin Shullaz, një trup njeriu, i dekompozuar. Nga verifikimet paraprake dyshohet se trupi i përket shtetasit E. N., 49 vjeç, banues në Laç. Gjithashtu, nga veprimet paraprake dyshohet se ky shtetas e ka humbur jetën para disa muajsh, si pasojë e një aksidenti rrugor.

Grupi hetimor, në drejtimin e Prokurorisë, po punon për dokumentimin e shkakut të vdekjes së këtij shtetasi.