Trajneri i Atlético Madridit, Diego Simeone, dhe mesfushori Rodrigo De Paul dolën në konferencën për shtyp në prag të derbit kundër Real Madridit në 1/8 e Ligës së Kampionëve. Trajneri argjentinas ka një skuadër të motivuar, ndaj derbi pritet të jetë i zjarrtë mes dy ekipeve që e njohin mirë njëri-tjetrin. Ja deklaratat kryesore të Simeones:

Historia e Realit në Champions: "Është e jashtëzakonshme. Të martën do të kemi një mundësi të shkëlqyer të tregojmë veten".

La Liga apo Champions: "Tani nuk mund të mendoj për kampionatin, sepse ka ende shumë ndeshje për t’u luajtur. Përqendrohem gjithmonë te sfida e radhës".

Golat me kundërsulm: "Më pëlqen kur thoni se shënimi i golave në kundërsulm është një përmirësim. Julian (Álvarez) po bën një punë të shkëlqyer, edhe ekipi ka një stil loje të qartë, të ndërtuar mbi historinë e klubit".

Pa humbje kundër Realit dhe Barçës këtë sezon: "Gjithmonë kam thënë se Real Madridi dhe Barcelona janë aty ku janë për shkak të historisë së tyre. Ne jemi në proces rritjeje të vazhdueshme".

Gjendja e tij personale: "Jam shumë i motivuar, sikur të ishte dita ime e parë këtu. Që nga momenti kur erdha, qëllimi ishte ta bëja këtë klub të rëndësishëm në Europë dhe mendoj se po e përfaqësojmë mirë".

Qëllimi për të martën, të dalin të padëmtuar apo të lënë një shenjë të fortë: "Të dyja janë të lidhura. Nuk shoh ndonjë diferencë të madhe mes dy varianteve".

E ardhmja e Julian Álvarez: "Është ende shumë i ri, ka nevojë të vazhdojë të përmirësohet. Ka shumë potencial dhe ne do të përpiqemi ta ndihmojmë që të rritet më shumë".

A është Atlético Madridi favorit: "E respektoj idenë për të pasur një favorit, por e dimë forcën tonë dhe si ta shfrytëzojmë. Do të përpiqemi ta çojmë lojën në zonat ku mund ta dëmtojmë kundërshtarin".

Derbet e fundit: "Një ndeshje e këtij niveli vendoset nga detajet. Të dyja palët e dinë rëndësinë e këtyre përballjeve. Skuadra që i menaxhon më mirë këto momente do të kalojë më tej".