Tiranë, 4 mars 2025 – GJKKO ka rrëzuar kërkesën e kryebashkiakut të Tiranës, Erion Veliaj, për kthimin e telefonit celular që iu sekuestrua gjatë arrestimit të tij. Veliaj kishte pretenduar se sekuestrimi i telefonit ishte bërë në mënyrë të paligjshme.

Kryebashkiaku Erion Veliaj u arrestua në zyrën e Bashkisë më 10 shkurt, nën akuzën për “Korrupsion pasiv i funksionarëve të lartë shtetërorë ose të zgjedhurve vendorë”, veprën penale të kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”. Bashkëshortja e tij, Ajola Xoxa, është lënë në masën e sigurimit “detyrim paraqitje”.

Sipas SPAK, nga hetimet paraprake ka rezultuar se, Veliaj dhe bashkëshortja e tij kanë krijuar dhe operuar një mekanizëm për të siguruar përfitime të parregullta nga fondet publike të administruara nga Bashkia Tiranë, duke pasuruar personalisht Veliajn dhe familjen e tij përmes veprimeve të kundërligjshme dhe të kamufluara.