Trajneri Fabio Capello analizoi ndeshjen mes Napolit dhe Interit (1-1) në faqet e “Gazzetta dello Sport”: "Interi mbetet ende kryesues dhe rezultati i jep forcë. Ndërkohë, Napoli ishte në disavantazh, rrezikoi të humbiste, por në fund arriti barazimin duke dominuar ndeshjen.

Përtej zhgënjimit për rezultatin, kjo është një shtysë e madhe për besimin. Conte e di që ka në dorë një grup që do të luftojë deri në fund për titullin dhe tani e ndjek atë me më shumë vendosmëri".

Duke vazhduar analizën e tij, Capello shtoi: "Vura re një diferencë të dukshme në aspektin fizik. Napoli ishte më i freskët, ndërsa Interi vuajti shumë. Pashë pak konfuzion në lojën e Interit, dukej sikur nuk arrinte të orientohej si duhet. Nuk më bindën as zëvendësimet e Inzaghit.

Ai preferoi të hidhte në fushë Correa në vend të Arnautovic, i cili vinte nga një gol spektakolar kundër Lazios në Kupën e Italisë. Gjithashtu, dalja e Bastonit më habiti, nuk më dukej as i kënaqur me zëvendësimin…"

Duke folur për Napolin, Capello përfundoi: "Më pëlqen Billing, ka personalitet dhe depërtime të mira. Edhe kundër Comos më kishte lënë një përshtypje të mirë, e konfirmoi veten ndaj zikaltërve. Këto janë sinjale të rëndësishme.

Conte e di që mund të mbështetet edhe tek ata që luajnë më pak. Mos harrojmë që Napoli dhe Atalanta mund të përqendrohen vetëm te një objektiv, titulli. Ky është një avantazh i madh për ta, edhe Atalanta mund të buzëqeshë, sepse mbetet në garë”.