Julián Álvarez, autori i golit të fitores për Atlético Madridin në ndeshjen kundër Athletic Club, analizoi sfidën për “LaLigaTV”: "Ishte një fitore shumë e rëndësishme, e dinim që nuk do të ishte e lehtë, por tani jemi në krye. Krijuam shumë raste dhe e menaxhuam mirë ndeshjen, edhe pse nuk ishte e thjeshtë.

Goli erdhi dhe arritëm ta ruanim avantazhin. Personalisht ndihem shumë mirë këtu, njerëzit e klubit më kanë dhënë gjithë dashurinë e tyre. Gjëja më e rëndësishme është ekipi, por golat e rrisin shumë besimin. Gara për titull? Ende po luftojmë, rruga është e gjatë, por me punë dhe përulësi do të fitojmë edhe më shumë ndeshje".

Duhet pranuar se sulmuesi argjentinas po bëhet gjithnjë e më vendimtar në ekipin e Diego Simeones. Nga ana e tij, Rodrigo De Paul e ka pritur me entuziazëm fitoren e Atlético Madridit ndaj Athletic Club. Mesfushori argjentinas u shpreh për “LaLigaTV”: "Jemi të kënaqur, puna po jep frytet e veta. Kemi vuajtur, kemi luajtur kundër një skuadre të madhe, që di t’i bëjë gjërat shumë mirë. Goli erdhi, e mbrojtëm dhe jemi të lumtur".

Më pas foli për bashkëkombësin e tij, Julián Álvarez, i cili vazhdon të jetë vendimtar: "Kur klubi shkoi ta kërkonte, e dinte mirë çfarë po bënte. Është një lojtar i madh, ka ADN-në e duhur për të luajtur në këtë ekip. Ndonjëherë duhet kohë për t’u përshtatur në një mjedis dhe klub të ri, por për të ishte e lehtë. E meriton plotësisht”.

Sa i përket kalendarit të ngjeshur, argjentinasi shtoi: “Ka lodhje të madhe, bëjmë gjithçka për t’u rikuperuar, por nuk është e lehtë, sidomos kur përballesh me ekipe të nivelit më të lartë".