Në një intervistë për “Gazzetta dello Sport”, Marcello Lippi analizoi momentin e Interit, Napolit dhe trajnerëve të tyre, Simone Inzaghit dhe Antonio Contes.

Për garën e titullit: "Nuk e prisja një duel të tillë të drejtpërdrejtë. Interi dhe Napoli ishin favoritët e mi bashkë me Juventusin, por Interi është më i fortë. Zikaltrit kanë ende potencial të pashfaqur plotësisht. Napoli ka bërë mirë që ka qëndruar lart, por mos harroni Atalantën".

Conte apo Inzaghi: "Conte ka qenë një nga lojtarët e mi, ishte gjithmonë një pikë referimi për shokët e skuadrës. Inzaghin e njoh më pak, por po kalon një fazë të madhe rritjeje profesionale".

A është kriza e Interit dhe Napolit e vërtetë: "Tri ndeshje pa fitore nuk janë arsye për të folur për krizë. Si mund të jenë në krizë dy ekipet e para në renditje? Për mua, Interi mund ta fitojë Champions League. Mund të mundë këdo. Është një ekip i ekuilibruar dhe i fortë".

Interi ka më shumë ndeshje: “A do të lodhet? Jo, përkundrazi. Kampionati, Championsi, Kupa e Italisë, ky kalendar i mbushur është njëlloj avantazhi ndaj Napolit. Kur luan vazhdimisht, motivimi është më i madh. Lojtarët e mi nuk donin të pushonin as në miqësore".

Sfida kryesore e së dielës: "Lobotka kundër Çalhanoglu? Napoli dhe Interi lëvizin rreth tyre. Interi e ka vuajtur mungesën e turkut. Të dy janë më të ngjashmit me Pirlon në mënyrën si e interpretojnë rolin, por Pirlo ishte një nivel tjetër. Vetëm Modric mund të krahasohet me të".