Presidenti i Shteteve të Bashkuara, Donald Trump, ka konfirmuar vizitën e homologut ukrainas, Volodymyr Zelensky, në SHBA, e cila do të realizohet këtë të premte. Komentet e Trump u bënë gjatë takimit të tij të parë të kabinetit në Shtëpinë e Bardhë, që nga inaugurimi i tij muajin e kaluar.

Trump u përqendrua tek marrëveshja e mineraleve me Ukrainën, duke deklaruar se ky ishte një hap i rëndësishëm për të siguruar burimet e nevojshme për SHBA. “Shtetet e Bashkuara kanë nevojë për toka të rralla dhe Ukraina i ka ato. Kjo marrëveshje do të na lejojë të kthejmë paratë tona,” tha ai. Ai shtoi se marrëveshja “është shumë e mirë edhe për Ukrainën.”

Marrëveshja përfshin elementë të rrallë, të cilët janë thelbësorë për industrinë e teknologjisë dhe mbrojtjes, sektorë që SHBA i konsideron gjithnjë e më strategjikë. Të tillë minerale janë 17 elemente kimike të domosdoshëm, dhe vlera e tregut të tyre pritet të rritet në 21.7 miliardë dollarë deri në vitin 2031.

Trump theksoi gjithashtu se taksapaguesit amerikanë nuk duhet të paguajnë për fondet që SHBA ka dhënë Ukrainës që nga fillimi i pushtimit rus, duke e konsideruar shumën e mbështetjes si 350 miliardë dollarë, edhe pse disa vlerësime ndërkombëtare e nxjerrin shifrën më afër 120 miliardë dollarëve. Ai shtoi: “Më e rëndësishmja, deri tani, ne do të bëjmë një marrëveshje me Rusinë dhe Ukrainën për të ndaluar vrasjen e njerëzve.”

Në kuadër të marrëveshjes, Ukraina do të ofrojë akses në rezervat e saj të pasura minerale, përfshirë grafitin dhe litiumin, që janë të domosdoshëm për zhvillimin e teknologjisë. Ukraina ka rreth 2.6 miliardë tonë rezerva minerale, duke përfshirë edhe titanin dhe materiale të tjera që janë të nevojshme për sektorët strategjikë. Këto burime minerale janë veçanërisht të rëndësishme në konfrontimin e vazhdueshëm mes SHBA dhe Rusisë, sidomos në zonën e Donbasit, ku Rusia ka shtrirë kontrollin mbi disa prej këtyre resurseve.

Marrëveshja gjithashtu do të ndihmojë SHBA të reduktojë varësinë e saj nga Kina, prodhuesi më i madh i mineraleve të rralla në botë, duke mundësuar që Uashingtoni të sigurojë burime të tjera, kryesisht nga Ukraina dhe Kanada.

Vlerësimi i përgjithshëm i pasurive minerale të Ukrainës, që ndodhen në territoret nën kontrollin rus, arrin deri në 12.400 miliardë dollarë, ndërsa SHBA ka rreth 3.6 milionë tonë minerale të rralla, me Kanadanë që ka gjithashtu një rezervë të konsiderueshme prej 14 milionë tonësh.