Kukës, 25 shkurt 2025 – Gjykata e Kukësit ka lënë në burg Zenel Muçmatën, i cili dyshohet përfshirë në plagosjen e kushëririt të kryebashkiakut të Kukësit, Elvis Halilaj. Kërkesa për masën e sigurimit personal, e paraqitur nga prokurorja Vilma Kapaj, u miratua nga gjyqtarja paraprake e Gjykatës së Shkallës së Parë, Suada Kurti, duke vendosur lënien në burg pa afat të Muçmatës.

Ngjarja që ka tronditur qytetin e Kukësit ndodhi më 19 shkurt të këtij viti, në fshatin Bicaj, ku Muçmata, së bashku me Genci Pingulin dhe Enes Asllanajn, dyshohet se janë përfshirë në plagosjen e Elvis Halilaj. Muçmata akuzohet për "Vrasjen me paramendim", mbetur në tentativë, kryer në bashkëpunim dhe "Prodhimi dhe mbajtja pa leje e armëve shpërthyese dhe municionit".

Arrestimi i Muçmatës erdhi pas hetimeve intensive, ndërsa vlerësimi për masën e arrestit të të dyshuarve të tjerë, Genci Pingulit dhe Enes Asllanajt, do të bëhet më 27 shkurt. Ky rast ka tërhequr vëmendjen e opinionit publik për lidhjet e mundshme mes ngjarjes dhe politikës lokale, duke u bërë kështu një çështje me interesa të shumta.