Komisioni Rregullator në Komisionin Qendror të Zgjedhjeve (KQZ) ka rrëzuar ditën e sotme kërkesën e Partisë Demokratike për të mundësuar votimin e emigrantëve shqiptarë që nuk disponojnë një mjet identifikimi apo pasaportë biometrike shqiptare në zgjedhjet e 11 majit 2025.

Kërkesa e Partisë Demokratike u hodh poshtë me 3 vota kundër dhe 2 pro. PD propozoi që emigrantët shqiptarë të mund të votojnë edhe me dokumente identifikimi të lëshuara nga shtetet ku jetojnë, si pasaportat ose letërnjoftimet e huaja.

Emigrantët shqiptarë që jetojnë jashtë vendit kanë shprehur interes të madh për të marrë pjesë në zgjedhjet e 11 majit, dhe kjo votë e diasporës është konsideruar një risi, por edhe një sfidë e madhe për organizimin e zgjedhjeve. Ata mund të regjistrohen për të votuar deri më 4 mars 2025, duke shfrytëzuar mundësinë për të dhënë votën nga vendi ku jetojnë.