Tiranë, 25 shkurt 2025- Policia e Shtetit ka dalë me një reagim zyrtar lidhur me ngjarjen e ndodhur një ditë më parë në kryeqytet, ku një efektiv policie mbeti i plagosur. Ngjarja ka ndodhur rreth orës 17:30, në zonën e Freskut, ku efektivët e Policisë Rrugore i bënë shenjë ndalimi automjetit me drejtues shtetasin, Isnik Nokshiqi.

Sipas njoftimit të policisë, pas ndalimit të automjetit, 36-vjeçari ka shfaqur shenja nervozizmi dhe ka filluar të debatojë dhe të kundërshtojë me fjalë punonjësit e Policisë. Pas disa minutash, ai është larguar me shpejtësi duke aksidentuar punonjësin e Policisë së Qarkullimit Rrugor, shtetasin Altin Lami, dhe duke rrezikuar jetën e punonjësve të tjerë të Policisë.

Si pasojë e aksidentit, punonjësi i policisë, Altin Lami, ka mbetur i dëmtuar dhe është dërguar në spital për të marrë kujdesin e nevojshëm mjekësor. Ndërkohë, pas veprimeve të shpejta, Policia ka arrestuar shtetasin Isnik Nokshiqi, 36 vjeç, banues në Tiranë, i cili akuzohet për "Vrasjen e punonjësit të Policisë së Shtetit", mbetur në tentativë.

Materialet procedurale iu referuan Prokurorisë për veprime të mëtejshme.

Njoftimi i plotë i Policisë:

Në vijim të informacionit paraprak të ditës së djeshme, për aksidentin e ndodhur në Fresk, ku për pasojë mbeti i dëmtuar 1 punonjës policie, ju bëjmë me dije:

Rreth orës 17:30, në zonën e Freskut, shërbimet e Komisariatit të Qarkullimit Rrugor, të cilët kanë qenë në shërbim, i kanë bërë shenjë ndalimi automjetit me drejtues shtetasin I. N. (i cili u identifikua më pas).

Pas ndalimit të automjetit, drejtuesi ka shfaqur shenja nervozizmi dhe ka filluar të debatojë dhe të kundërshtojë me fjalë punonjësit e Policisë.

Drejtuesi i automjetit është larguar me shpejtësi me automjet duke aksidentuar punonjësin e Policisë së Qarkullimit Rrugor shtetasit A. L. dhe duke rrezikuar jetën e punonjësve të tjerë të Policisë.

Për pasojë është dëmtuar punonjësi i Policisë A. L., i cili ndodhet në spital, në kujdesin e mjekëve.

Në përfundim të veprimeve është arrestuar shtetasi I. N., 36 vjeç, banues në Tiranë, për veprën penale “Vrasja e punonjësit të Policisë së Shtetit”, mbetur në tentativë.

Materialet procedurale iu referuan Prokurorisë, për veprime të mëtejshme.