Tiranë, 24 shkurt 2025 – Seanca në Gjykatën e Posaçme për Korrupsionin dhe Krimin e Organizuar (GJKKO) për verifikimin e masave të sigurisë ndaj Safet Bajrit, Behar Bajrit dhe Asmer Bilalit është shtyrë. Edhe pse janë kaluar dy orë, seanca ende nuk ka nisur, dhe shkaku për këtë është bërë ndryshimi i gjyqtarit që do të shqyrtojë çështjen.

Çështja ishte caktuar për gjyqtaren Etleva Deda, por pasi ajo ndodhej jashtë vendit, dosja i është kaluar gjyqtares Irena Gjoka. Me rikthimin e Deda, çështja i është rikthyer asaj për shqyrtim.

Arrestimi i Safet Bajrit

Safet Bajri u arrestua më 21 shkurt 2025. GJKKO miratoi masën “arrest me burg” për të dhe kërkesën e SPAK për kryerjen e analizës së ADN-së së tij. Sipas raportimeve, kur Bajri u soll nga Shkodra në Tiranë, një ekspert i pranishëm për të marrë kampionet e ADN-së nuk ka mundur ta kryejë këtë procedurë, pasi i arrestuari ka kërkuar që kjo të bëhej në një ditë tjetër.

Akuzat ndaj Bajrave dhe Bilalit

Në njoftimin e Prokurorisë së Posaçme, thuhet se ndaj Safet Bajrit, Behar Bajrit dhe Asmer Bilalit rëndojnë akuzat për “Vrasje me paramendim”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Të tre akuzohen për organizimin dhe kryerjen e vrasjes së Fatbardh Licit. SPAK ka mbledhur prova të mjaftueshme që vërtetojnë se ata ishin të përfshirë në ekzekutimin e Licit. Dyshohet se motivi i vrasjes lidhet me një hakmarrje nga Behar Bajri ndaj Ibrahim Licit për vrasjen e ish-efektivit të Policisë së Shtetit, Boran Bërçana, dhe bashkëjetueses së tij, Silva Ndocit, të cilët u ekzekutuan në mjetin e tyre.

Vrasja e Fatbardh Licit dyshohet se ishte një hakmarrje për këtë ngjarje, duke e lidhur Bajrave dhe Bilalit me aktivitetin e organizatës kriminale dhe grupit të strukturuar që vepronin në këtë zonë.