Pas humbjes 2-1 të Milanit në transfertë ndaj Torinos, e cila erdhi vetëm disa ditë pas eliminimit nga Liga e Kampionëve përballë Feyenoordit, mbrojtësi Strahinja Pavlović, një nga të paktët që nuk e meritonte vlerësimin negativ për paraqitjen ndaj "granatave", bëri deklaratat e tij për “SportMediaset”: "Ndodhi diçka që sigurisht nuk e donim. Pas një paraqitjeje të dobët në Champions, ishim të gatshëm të reagonim, por fatkeqësisht nuk ishte dita jonë".

Mbrojtësi serb vijoi: "Pësuam një autogol të pafat, më pas e kontrolluam ndeshjen, por humbëm shumë raste të mira. Barazuam, por menjëherë pas kësaj pësuam sërish nga një situatë që nuk duhet të ndodhë në këtë nivel. Në shumë momente ishim të pafat. Duket e vështirë të flasësh për këtë tani, por ishte një mbrëmje vërtet e keqe".

Për krizën e Milanit: "Çfarë po ndodh? Është e vështirë të thuhet. Jam futbollist profesionist prej 7 vitesh dhe nuk më kanë ndodhur kurrë kaq shumë gjëra të pafat sa në muajt e fundit. Është vërtet e vështirë për t’u shpjeguar, por siç e kam përsëritur shpesh, duhet të jemi të fortë dhe të qëndrojmë të bashkuar.

Nuk duhet të fajësojmë njëri-tjetrin, kjo nuk është e mirë. Duhet të qëndrojmë sa më shumë të bashkuar. Luajmë çdo 3-4 ditë, kështu që duhet të vazhdojmë të shtyjmë përpara, është e vetmja mënyrë".