Greqi,22 Shkurt 2025- Një ngjarje e pazakontë ka tronditur zonën e Akratës në Greqi, kur një 50-vjeçar shqiptar, i arrestuar për dhunë në familje, arriti të arratiset nga Spitali Psikiatrik i Universitetit të Patrës.

Burimet policore bëjnë me dije se i arrestuari kishte kërcënuar bashkëshorten e tij, një grua 45-vjeçare, e cila, pas kërcënimeve për vetëvrasje dhe deklaratave se do të hidhej nga çatia, kontaktoi menjëherë autoritetet. Pas arrestimit, ai u dërgua në një spital psikiatrik për vlerësim mjekësor.

Megjithatë, 50-vjeçari arriti të arratiset nga spitali, duke u larguar me taksi drejt shtëpisë së tij në Akrata. Pas disa orësh, ai u kap nga forcat e policisë në momentin që po kthehej në banesën e tij, dhe tashmë është në pranga.

Ky incident ka tërhequr vëmendjen e mediave dhe autoriteteve greke, të cilat po hetojnë rrethanat e arratisjes dhe përfshirjen e të arrestuarit në krimet e mëparshme.