Prishtinë, 21 shkurt 2025 – Kryetari i Nismës Socialdemokrate, Fatmir Limaj, ka bërë thirrje për bashkëpunim mes partive politike për të shmangur një krizë qeveritare pas zgjedhjeve.

Në një intervistë televizive, Limaj u shpreh se do të përgjigjet kërkesave për koalicion për të mirën e vendit.

“Kush të më ftojë në tavolinë, unë shkoj ulna për tema nacionale. Çka po të vyen një qeveri jo funksionale, kurrë. Nuk hyjë në një qeveri jofunksionale. As me opozitën nuk e përjashtojë që ulem,” tha ai.

Limaj theksoi se Kosova ka nevojë urgjente për një qeverisje stabile, duke marrë parasysh zhvillimet e fundit ndërkombëtare dhe rajonale. Sipas tij, procesi zgjedhor është përmbyllur dhe tani është koha për të marrë përgjegjësitë.

“Ne jemi të vegjël, kanë punë të mëdhenjtë për t’u takuar me njëri-tjetrin. S’ka certifikim të rezultateve. Zgjedhjet janë kryer. Tani është Kosova në fokus. Besoj se pas përfundimit të procesit, duhet të ulemi sipas përgjegjësisë. Vota për të festuar është një natë, por më pas ajo shndërrohet në përgjegjësi. Të nesërmen, mijëra qytetarë presin veprime konkrete,” ka deklaruar ai.

Limaj ka theksuar se tri partitë kryesore në vend kanë një përgjegjësi të madhe dhe duhet të bashkëpunojnë për të formuar një qeveri stabile.

“Janë tri parti të mëdha që mbajnë barrën kryesore dhe duhet të bëjnë hapa konkretë. Nuk guxojmë të lejojmë krizë qeveritare për shkak të inateve politike,” ka theksuar ai.

I pari i Nismës Socialdemokrate ka deklaruar se nuk do të bëjë kalkulime partiake dhe se vendimet politike duhet të jenë në të mirë të gjeneratave të ardhshme.

“Çdo veprim që e bën politikani është për gjeneratat e ardhshme. Nuk do ta shihni Fatmir Limajn të kalkulojë elektoralisht,” ka përfunduar ai.