Tiranë, 20 Shkurt 2025 – Gjykata ka urdhëruar kontrollin e pasurive dhe banesave të Arben Isufajt, i njohur me nofkën "Ben Qimja", pas akuzave për kanosje me jetë të gjyqtarit Vladimir Cjapi. Arben Isufaj, një figurë e njohur në botën e krimit në Shqipëri për aktivitetet e tij kriminale, përfshirë trafikun e drogës, është nën hetim nga autoritetet.

Në vitin 2020, Operacioni Forca e Ligjit kishte dërguar një letër Isufajt, ku i kërkohej të justifikonte pasuritë që kishte nën zotërim. Pas kësaj, më 7 tetor 2021, SPAK vendosi sekuestrimin e pasurive të tij, ndërsa më 3 maj 2023, Gjykata e Posaçme e Shkallës së Parë për Krimet e Rënda (GJKKO) vendosi konfiskimin dhe kalimin në favor të shtetit të këtyre pasurive.

Pasuritë që u konfiskuan përfshijnë:

Objekt “Pulari”, shoqëria tregtare “ISUFAJ 2001”, e regjistruar në fshatin Grizë-Patos, e cila merret me rritjen dhe tregtimin e zogjve të pulës; 33% e kuotave të kapitalit të Shoqërisë “AKILI ALB” SHPK; Pasuri të paluajtshme, përfshirë truall dhe tokë në Fier, si dhe arë në Sheq i Madh-Fier; Automjete të ndryshme të markave AUDI, MERCEDES BENZ dhe DAIMLER CHRYSLER, të cilat ishin në pronësi të anëtarëve të familjes Isufaj dhe të tjerë të lidhur me të. Pas kësaj lëvizjeje, janë marrë masa për kontrollin e pasurive të tij dhe për hetimin e mëtejshëm të aktivitetit të paligjshëm që ka zhvilluar.