Trajneri i Juventusit, Thiago Motta, komentoi për “Sky Sport” disfatën ndaj PSV-së, e cila vulosi eliminimin e bardhezinjve nga Liga e Kampionëve.

"Pjesën e parë e zhvilluam siç duhet, por në të dytën vuajtëm shumë. PSV shtyu fort dhe ne patëm vështirësi, ata bënë një ndeshje të shkëlqyer. E dinim që do të ishte e vështirë. Nuk mund të jemi të kënaqur me golat e pësuar, në këto situata duhet të bëjmë shumë më mirë nëse duam të jemi konkurrues në këtë nivel".

Për zëvendësimet dhe vështirësitë në pjesën e dytë: "Nuk arritëm ta menaxhonim rezultatin në favorin tonë. Zëvendësimet? Ato të Renato Veiga dhe Koopmeiners ishin të detyruara, pasi Koop kishte temperaturë. Vendosa të fus Cambiaso në mesfushë, sepse ishte i vetmi që mund të luante në atë rol në atë moment, por edhe ai nuk ishte në gjendje të mirë dhe kërkoi të dilte".

Për problemet me presingun në pjesën e dytë: "Nuk mendoj se i vonova zëvendësimet. Pasi barazuam, po, doja të ndërhyja. Por nuk besoj se prita shumë, i bëra në momentin e duhur".