Tiranë, 20 Shkurt 2025 – Pas rinisjes së negociatave mes Rusisë dhe Shteteve të Bashkuara të Amerikës në Arabinë Saudite, mediat ndërkombëtare kanë ngritur shqetësime në lidhje me mundësinë e tërheqjes së trupave amerikane nga disa shtete të Evropës. Sipas një artikulli në gazetën “Bild”, shërbimet sekrete dhe politikanët e Perëndimit janë të alarmuar se këto bisedime mund të çojnë në fundin e pranisë ushtarake të SHBA-ve në rajon.

Mediat bëjnë të ditur se një nga kërkesat e presidentit rus Vladimir Putin, që daton që nga viti 2021, ka qenë largimi i trupave amerikane nga të gjitha shtetet e NATO-s që janë anëtarësuar pas vitit 1990. Ky fakt ka shkaktuar shqetësim në shumë shtete evropiane, të cilat e shohin praninë ushtarake amerikane si një garanci për sigurinë dhe stabilitetin e rajonit.

Një skenar i mundshëm i diskutuar nga ekspertët është ai i një "pushtimi të shpejtë të ushtrisë ruse në ish-republikat sovjetike", përfshirë Estoninë, Letoninë, Lituaninë, dhe mundësinë e një "konflikti të hapur me Poloninë", çka do të kërcënonte sigurinë e Evropës.

Në një postim të ish-ministrit të Punëve të Jashtme të Lituanisë, Gabrielius Landsbergis, theksohet se kërkesa e Lavrovit për tërheqjen e NATO-s në kufijtë e vitit 1997 mund të përkthehet në një kërkesë nga Putini për largimin e trupave të NATO-s nga të gjitha ish-vendet sovjetike, përfshirë Balltikun dhe vende të tjera të Evropës Lindore.

Sipas analizave të “Financial Times”, disa zyrtarë evropianë besojnë se ish-presidenti Donald Trump mund të pranojë tërheqjen e trupave amerikane nga Baltiku dhe ndoshta edhe nga rajone më të perëndimshme, duke lënë kështu BE-në të pambrojtur kundër mundësive të një ofensivë ruse. Ky zhvillim ka ngritur shqetësime për sigurinë në rajon, duke përfshirë mundësinë që trupat amerikane të tërhiqen edhe nga Kosova.