Në një hap të rëndësishëm drejt rritjes së transparencës dhe llogaridhënies, Agjencia e Administrimit të Pasurive të Sekuestruara dhe Konfiskuara (AAPSK) ka publikuar për herë të parë një katalog të detajuar me pasuritë e konfiskuara.

Ky dokument përmban informacion të plotë mbi vendimin gjyqësor të formës së prerë që ka çuar në konfiskimin e pasurive, si dhe të dhëna mbi llojin, vendndodhjen dhe statusin aktual të tyre.

Publikimi i katalogut vjen në përputhje me Ligjin Nr. 34/2019 “Për Administrimin e Pasurive të Sekuestruara dhe të Konfiskuara”, i cili përcakton rregullat dhe procedurat për sekuestrimin, konfiskimin dhe administrimin e pasurive të përfituara në mënyrë të paligjshme.

Kjo nismë synon të garantojë një informim më të gjerë të publikut dhe të palëve të interesuara, duke forcuar besimin në procesin e administrimit të pasurive të konfiskuara.

Kryeadministratorja e AAPSK, Risena Xhaja, e cila mori detyrën në tetor 2024, udhëhoqi nismën për hartimin e katalogut, duke ngritur një grup pune të dedikuar për këtë proces. Synimi kryesor i publikimit të katalogut është rritja e transparencës dhe aksesit të publikut në informacionin mbi këto pasuri, përmirësimi i llogaridhënies në administrimin e tyre dhe forcimi i bashkëpunimit midis institucioneve dhe qytetarëve.

Përveç katalogut të pasurive të konfiskuara, AAPSK është duke punuar edhe për publikimin e një katalogu të ngjashëm për pasuritë e sekuestruara.

Paralelisht, po realizohet një inventarizim i plotë i databazës së pasurive nën administrim, me synimin për të rritur më tej transparencën, eficiencën dhe mirëadministrimin e tyre.

Ky hap konsiderohet një zhvillim pozitiv në përpjekjet e institucioneve për të luftuar korrupsionin dhe për të siguruar një menaxhim më të drejtë dhe të hapur të pasurive të sekuestruara dhe konfiskuara në Shqipëri.

Katalogu i pasurive të konfiskuara është i disponueshëm për publikun KETU