Tiranë, 18 shkurt 2025 – Policia ka nisur një aksion blic në qytetin e Shkodrës në orët e para të mëngjesit të sotëm dhe dyshohet se ka lidhje me masakrën e Dobraçit. Sipas informacioneve, forcat RENEA kanë zbarkuar në banesën e Safet Bajrit dhe pritet shoqërimi i tij për t’u marrë në pyetje nga policia.

Momentalisht nuk ka të dhëna nëse ka persona të tjerë të arrestuar apo shoqëruar. Atentati në fjalë ndodhi pasditen e 30 tetorit në Dobraç të Shkodrës, ku në rrugën kryesore që lidh qytetin me Malësinë e Madhe, një automjet i ka prerë rrugën një “Mercedes”-i duke qëlluar me breshëri kallashnikovi mbi të.

Viktimat ishin Hamza Lici, i cili vdiq në vendin e ngjarjes, Arlind Bushati, i cili ndërroi jetë në spital, dhe Flutura Basha, një kalimtare e rastit, teksa ndodhej me bashkëshortin e saj në një motor. Ndërkohë, ky i fundit, identifikuar si Bashkim Basha, ndërroi jetë në spital, 5 ditë pas atentatit.

Në makinën e viktimave, shofer ka qenë Hamza Lici dhe pasagjer Arlind Bushati. Lici ka humbur kontrollin e makinës duke përplasur motorin në të cilin ndodhej çifti Basha.