Kina është e gatshme të forcojë komunikimin strategjik me Bashkimin Evropian, të rrisë mirëkuptimin e ndërsjellë dhe të punojë së bashku për t’i sjellë më shumë qëndrueshmëri botës, tha të shtunën ministri i Jashtëm i Kinës Wang Yi.

"Ndërmjet Kinës e BE-së nuk ka konflikte të thella interesi apo përplasje gjeopolitike," theksoi Wang, gjatë një takimi me përfaqësuesen e lartë për punët e jashtme dhe politikën e sigurisë të BE-së Kaja Kallas, në kuadër të Konferencës së 61-të të Sigurisë të Mynihut.

Ai u shpreh më tej që si Kina, ashtu edhe BE-ja mbeten të përkushtuara ndaj multilateralizmit, mbrojnë statusin qendror të OKB-së, besojnë se çështjet ndërkombëtare duhet të trajtohen nëpërmjet dialogut e konsultimeve dhe kundërshtojnë çdo formë ngacmimi.

Duke vënë në dukje që ky vit shënon 50-vjetorin e vendosjes së marrëdhënieve diplomatike midis Kinës dhe BE-së, Wang tha se të dyja palët duhet ta shfrytëzojnë këtë mundësi për të rishikuar përvojën e fituar, për të ritheksuar partneritetin dhe për të ruajtur frymën e dialogut e të bashkëpunimit.

Kina është e gatshme të organizojë një sërë aktivitetesh festive me BE-në dhe të përgatitet mirë për raundin e ri të takimit të liderëve të të dy palëve.

Nga ana e saj, Kallas tha se BE-ja u kushton rëndësi të madhe marrëdhënieve me Kinën dhe është e gatshme të bashkëpunojë për përgatitjen e takimit të liderëve BE-Kinë, të kremtojë 50-vjetorin dhe të hartojë plane për zhvillimin e ardhshëm të marrëdhënieve dypalëshe.

Ajo vlerësoi rolin udhëheqës të palës kineze në trajtimin e ndryshimeve klimatike dhe në fusha të tjera, duke shtuar se BE-ja është e gatshme të bashkëpunojë me Kinën për të mbrojtur multilateralizmin dhe parimet e Kartës së Kombeve të Bashkuara.