Ronaldo (Fenomeni) ishte lojtari më i fortë i Interit gjatë epokës së Massimo Morattit. Nuk ka dyshime për këtë ish-presidenti zikaltër, i cili në një intervistë për “SportWeek” ka folur për kohën e tij në krye të klubit, duke u rikthyer edhe te largimi polemik i brazilianit:

"Me ne, Ronaldo ka zhvilluar sezonin e tij më të mirë absolut. Ia thashë vetë: E di që unë ndryshoj trajner çdo 3-4 muaj, po bën shumë zhurmë, por ndoshta edhe Cuper do të largohet shpejt… Megjithatë, ai tashmë kishte vendosur të shkonte te Real Madridi, edhe sepse mendoj se i kishin ofruar një rrogë shumë të lartë. Më vjen keq që gjithçka nisi nga çështja e trajnerit, që ishte krejtësisht e pavlerë. Ai nuk u largua nga Interi për shkak të trajnerit Hector Cuper".

Sipas Morattit, ka qenë një lojtar që e ka zemëruar më shumë se të gjithë, Domenico Morfeo: "Kundër Romës luajti një ndeshje katastrofike, pa asnjë dëshirë, me qëndrim krejtësisht sipërfaqësor. Pas ndeshjes shkova në dhomat e zhveshjes, i gjeta të gjithë të zemëruar për humbjen, ndërsa ai po qeshte. Nuk e durova dot".

Një tjetër shpërthim zemërimi ndodhi pas eliminimit nga Champions League kundër Manchester United në vitin 2009 me Mourinhon: "Pashë fytyra të dorëzuara, që thonin: Gjithsesi, dihet që në Europë shkon kështu… Nuk m’u besua, kujtova se po bënin shaka".